ಒಂದು ಬೀನ್ಸ್‌ನಲ್ಲಿ ಎಷ್ಟು ವಿಧ?
ಹೀಗೊಂದು ಪ್ರಶ್ನೆ ಮನಸ್ಸಿಗೆ ಬಂದು ಯೋಚಿಸಲು ಶುರು ಮಾಡಿದರೆ ಪಟ್ಟಿ ಬೆಳೆಯುತ್ತಲೇ ಹೋಗುತ್ತದೆ. ಗಿಡದಲ್ಲಿ ಬೆಳೆಯುವ ಬೆಂಗಳೂರಿನ ನಾಟಿ ಬೀನ್ಸ್, ನಮ್ಮ ಕಡೆ ಗಿಡ ಅವರೆ. ಚೌಳಿ ಕಾಯಿ, ಚಪ್ಪರದಲ್ಲಿ ಹರಡುವ ಚಪ್ಪರದ ಅವರೆ, ಬಳ್ಳಿಯಲ್ಲಿ ಬೆಳೆಯುವ ಹೈಬ್ರಿಡ್ ಹುರುಳಿಕಾಯಿ, ಅಂಗಿಕಸೆ ಅಥವಾ ಅಲಸಂದೆ…ಹೀಗೆ ಹೆಸರುಗಳೂ ರೂಪಗಳೂ ರುಚಿಗಳೂ ಬದಲಾಗುತ್ತಾ ಹೋಗುತ್ತವೆ.
ಬೀನ್ಸ್ ಎಂದರೆ ಮೊದಲಿನಿಂದಲೂ ನನಗೆ ಇಷ್ಟ. ಅದರಲ್ಲೂ ಮನೆಯಲ್ಲಿ “ಕಿಡ್ನಿಗೆ ಒಳ್ಳೆಯದಾಗುವ ಆಹಾರ ಮಾಡಬೇಕು” ಎಂದಾಗ ನನಗೆ ಸಿಕ್ಕಿದ್ದು ಒಂದು ದೊಡ್ಡ ಅವಕಾಶವೇ. ವಾರದಲ್ಲಿ ಮೂರು ದಿನ ವಿವಿಧ ಬಗೆಯ ಬೀನ್ಸ್ ತಳಿಯ ಪದಾರ್ಥಗಳು ಸಿದ್ಧವಾಗುತ್ತಿದ್ದವು. ಒಂದು ಬಗೆಯ ಪಲ್ಯ, ಮತ್ತೊಂದು ಬಗೆಯ ಸಾರು, ಇನ್ನೊಂದು ಬಗೆಯ ಉಸಳಿ. ತರಕಾರಿ ತಿನ್ನಿಸುವ ಕೆಲಸವೂ ಆಯಿತು, ಬೀನ್ಸ್ ಮೇಲಿನ ನನ್ನ ಪ್ರೀತಿಗೂ ಕಾರಣ ಸಿಕ್ಕಿತು.
ಆದರೆ ಒಂದು ಹಂತದಲ್ಲಿ ನನಗೆ ಇನ್ನೊಂದು ಕುತೂಹಲ ಶುರುವಾಯಿತು.
ಪ್ರಕೃತಿಯಲ್ಲಿರುವ ಇಷ್ಟೊಂದು ತರಕಾರಿಗಳು, ಹಣ್ಣುಗಳು, ಬೀಜಗಳು ಮತ್ತು ಗಡ್ಡೆಗಳು ನಮ್ಮ ದೇಹದ ಅಂಗಾಂಗಗಳನ್ನು ನೆನಪಿಸುವಂತಿರುವುದು ಏಕೆ?
ಒಂದು ಕಿಡ್ನಿ ಬೀನ್ಸ್ ಅನ್ನು ನೋಡಿದರೆ ಕಿಡ್ನಿಯ ಆಕಾರ ನೆನಪಾಗುತ್ತದೆ. ಹೃದಯದ ಆಕಾರವನ್ನು ಹೋಲುವ ಹಣ್ಣುಗಳು ಮತ್ತು ಎಲೆಗಳು ಕಾಣುತ್ತವೆ. ಟೊಮೇಟೊದ ಕೆಂಪು ಬಣ್ಣ ನೋಡಿದರೆ ರಕ್ತದ ನೆನಪು ಬರುತ್ತದೆ. ಹಾಗಲಕಾಯಿಯ ಒಳಗಿನ ವಿನ್ಯಾಸವನ್ನು ನೋಡಿದಾಗ ಮೇದೋಜ್ಜೀರಕ ಗ್ರಂಥಿಯ ಬಗ್ಗೆ ಯೋಚಿಸಬಹುದು. ಸೋರೆಕಾಯಿಯ ಉದ್ದವಾದ ಆಕಾರ ಕೆಲವರಿಗೆ ಗರ್ಭಕೋಶದ ರೂಪವನ್ನು ನೆನಪಿಸಬಹುದು. ವಾಲ್ನಟ್‌ ನೋಡಿದರೆ ಮೆದುಳಿನ ಎರಡು ಅರ್ಧಗೋಳಗಳು ನೆನಪಾಗುತ್ತವೆ. ಸಿಹಿಗೆಣಸಿನ ಒಳಭಾಗವನ್ನು ನೋಡಿದರೆ ಕಣ್ಣಿನ ಆಕಾರವನ್ನು ಹೋಲುತ್ತದೆ ಎಂದು ಹೇಳಲಾಗುತ್ತದೆ.
ಇವೆಲ್ಲವನ್ನು ನೋಡಿದಾಗ ನನಗೆ ಅನಿಸುವುದು – ಪ್ರಕೃತಿ ತನ್ನದೇ ಒಂದು ಭಾಷೆಯಲ್ಲಿ ನಮ್ಮೊಂದಿಗೆ ಮಾತನಾಡುತ್ತಿದೆಯೇ?
ತರಕಾರಿ ಅಥವಾ ಹಣ್ಣಿನ ಆಕಾರವು ಯಾವುದೋ ನಿರ್ದಿಷ್ಟ ಅಂಗಕ್ಕೆ ಅದು ಔಷಧಿಯಂತೆ ಕೆಲಸ ಮಾಡುತ್ತದೆ ಎಂಬುದಕ್ಕೆ ವೈಜ್ಞಾನಿಕ ಸಾಕ್ಷಿಯಲ್ಲ. “ಯಾವ ಅಂಗದಂತೆ ಕಾಣುತ್ತದೋ, ಅದೇ ಅಂಗಕ್ಕೆ ಅದು ಒಳ್ಳೆಯದು” ಎನ್ನುವ ಕಲ್ಪನೆಯನ್ನು ಆಧುನಿಕ ವಿಜ್ಞಾನ ಸಾಮಾನ್ಯ ನಿಯಮವಾಗಿ ಒಪ್ಪುವುದಿಲ್ಲ. ಆರೋಗ್ಯದ ನಿಜವಾದ ಸಂಬಂಧ ಅದರಲ್ಲಿರುವ ನಾರಿನಂಶ, ಜೀವಸತ್ವಗಳು, ಖನಿಜಗಳು, ಸಸ್ಯರಾಸಾಯನಿಕಗಳು, ಪ್ರೋಟೀನ್ ಮತ್ತು ಇತರ ಪೋಷಕಾಂಶಗಳೊಂದಿಗೆ ಇರುತ್ತದೆ.
ಆದರೆ ಅದನ್ನು ತಿಳಿದ ನಂತರವೂ ಪ್ರಕೃತಿಯ ಈ ರೂಪಕಗಳು ನನಗೆ ಇನ್ನಷ್ಟು ಸುಂದರವಾಗಿ ಕಾಣುತ್ತವೆ.
ಕಿಡ್ನಿ ಬೀನ್ಸ್ ಮತ್ತು ನಮ್ಮ ಮೂತ್ರಪಿಂಡಗಳು
ಕಿಡ್ನಿ ಬೀನ್ಸ್ ನೋಡಿದರೆ ಅದರ ಹೆಸರೇ ಕಿಡ್ನಿಯ ನೆನಪು ತರುತ್ತದೆ. ಆದರೆ ಅದರ ಕಿಡ್ನಿಯಂತಹ ಆಕಾರವೇ ಮೂತ್ರಪಿಂಡಕ್ಕೆ ಅದು ವಿಶೇಷವಾಗಿ ಉಪಯುಕ್ತವಾಗುವ ಕಾರಣವಲ್ಲ.
ಬೀನ್ಸ್‌ಗಳಲ್ಲಿ ಸಸ್ಯಜನ್ಯ ಪ್ರೋಟೀನ್, ಆಹಾರದ ನಾರಿನಂಶ, ಫೋಲೇಟ್‌, ಪೊಟ್ಯಾಸಿಯಂ ಮತ್ತು ವಿವಿಧ ಸಸ್ಯಪೋಷಕಾಂಶಗಳಿವೆ. ಸಾಮಾನ್ಯವಾಗಿ ಬೇಳೆ-ಕಾಳುಗಳನ್ನು ಒಳಗೊಂಡ ಸಮತೋಲಿತ ಆಹಾರ ಹೃದಯ ಮತ್ತು ಚಯಾಪಚಯ ಆರೋಗ್ಯಕ್ಕೆ ಸಹಾಯಕವಾಗಬಹುದು. ಆದರೆ ಮೂತ್ರಪಿಂಡದ ಕಾಯಿಲೆ ಇರುವ ವ್ಯಕ್ತಿಗೆ ಬೀನ್ಸ್ ಯಾವ ಪ್ರಮಾಣದಲ್ಲಿ ಸೂಕ್ತ ಎಂಬುದು ಬೇರೆ ಪ್ರಶ್ನೆ. ವಿಶೇಷವಾಗಿ ಮುಂದುವರಿದ ಮೂತ್ರಪಿಂಡದ ಕಾಯಿಲೆಯಲ್ಲಿ ಪೊಟ್ಯಾಸಿಯಂ, ರಂಜಕ ಮತ್ತು ಪ್ರೋಟೀನ್ ಪ್ರಮಾಣವನ್ನು ವೈಯಕ್ತಿಕವಾಗಿ ಗಮನಿಸಬೇಕಾಗಬಹುದು.
ಹೀಗಾಗಿ “ಕಿಡ್ನಿಯಂತೆ ಕಾಣುತ್ತದೆ, ಆದ್ದರಿಂದ ಕಿಡ್ನಿಗೆ ಒಳ್ಳೆಯದು” ಎನ್ನುವುದಕ್ಕಿಂತ, “ಬೀನ್ಸ್‌ನಲ್ಲಿರುವ ಪೋಷಕಾಂಶಗಳು ದೇಹದ ವಿವಿಧ ವ್ಯವಸ್ಥೆಗಳಿಗೆ ಹೇಗೆ ಸಹಾಯ ಮಾಡುತ್ತವೆ?” ಎನ್ನುವುದು ಸರಿಯಾದ ಪ್ರಶ್ನೆ. ಆದರೂ ಕಿಡ್ನಿ ಬೀನ್ಸ್ ಕೈಯಲ್ಲಿ ಹಿಡಿದಾಗ ಅದರ ಆಕಾರ ನಮ್ಮನ್ನು ನಮ್ಮ ದೇಹದ ಬಗ್ಗೆ ಯೋಚಿಸುವಂತೆ ಮಾಡುವುದು ಮಾತ್ರ ಬಹಳ ಚೆಂದ.
- ಹದಿಹರೆಯದವರಲ್ಲಿ ಸ್ವಯಂಪ್ರೀತಿ ಕಡಿಮೆಯಾಗಿರುವ ಲಕ್ಷಣಗಳೇನು?
- ಪ್ರೇಮದ ಊರಲಿ: ಹೆಣ್ಣಿನ ಮೇಲಿನ ಅಪವಾದಗಳನ್ನು ಹಂಚಬಾರದು, ಹೊಟ್ಟೆಯಲ್ಲಿಟ್ಟುಕೊಳ್ಳಬೇಕು!
- ನಿಂಬೆಹಣ್ಣಿನ ದೀಪವನ್ನು ಮನೆಯಲ್ಲಿ ಯಾಕೆ ಹಚ್ಚಬಾರದು? ವೈಜ್ಞಾನಿಕ ಮತ್ತು ಧಾರ್ಮಿಕ ಹಿನ್ನೆಲೆ
- ಜಿಯೋ ಷೇರುಗಳ ಖರೀದಿಗೆ ಮುಗಿಬೀಳುವ ಮುನ್ನ ಎಚ್ಚರ! ಸಾಮಾನ್ಯ ಹೂಡಿಕೆದಾರರು ತಿಳಿಯಬೇಕಾದ ಲಾಭ–ನಷ್ಟಗಳೇನು?
- ಧರ್ಮಸ್ಥಳ ಪ್ರಕರಣ – ಹಾಗೇ ಉಳಿದ ಪ್ರಶ್ನೆಗಳು
ಹೃದಯದಂತೆ ಕಾಣುವ ಆಹಾರಗಳು
ಹೃದಯದ ಆಕಾರವನ್ನು ಹೋಲುವ ಹಣ್ಣು, ಬೀಜ ಅಥವಾ ಎಲೆಯನ್ನು ನೋಡಿದಾಗ ನಮಗೆ ತಕ್ಷಣ ಹೃದಯ ನೆನಪಾಗುತ್ತದೆ. ಆದರೆ ಹೃದಯಕ್ಕೆ ಒಳ್ಳೆಯ ಆಹಾರದ ನಿಜವಾದ ಗುಟ್ಟು ಅದರ ಆಕಾರದಲ್ಲಿಲ್ಲ.
ಟೊಮೇಟೊವನ್ನು ತೆಗೆದುಕೊಳ್ಳಿ. ಅದರ ಕೆಂಪು ಬಣ್ಣಕ್ಕೆ ಕಾರಣವಾಗುವ ಲೈಕೋಪೀನ್‌ ಎಂಬ ಸಸ್ಯರಾಸಾಯನಿಕದ ಬಗ್ಗೆ ಸಾಕಷ್ಟು ಅಧ್ಯಯನಗಳಿವೆ. ಟೊಮೇಟೊ ಸೇರಿದಂತೆ ವಿವಿಧ ತರಕಾರಿ ಮತ್ತು ಹಣ್ಣುಗಳನ್ನು ಒಳಗೊಂಡ ಆಹಾರ ಮಾದರಿ ಹೃದಯದ ಆರೋಗ್ಯಕ್ಕೆ ಸಂಬಂಧಿಸಿದ ಅನೇಕ ಪ್ರಯೋಜನಗಳನ್ನು ಹೊಂದಿರಬಹುದು.
ಇಲ್ಲಿ ಪ್ರಕೃತಿಯ “ಚಿತ್ರ” ಮತ್ತು ವಿಜ್ಞಾನದ “ವಿವರಣೆ” ಒಂದೇ ಜಾಗದಲ್ಲಿ ಭೇಟಿಯಾಗುತ್ತವೆ. ನಾವು ಮೊದಲು ಆಕಾರವನ್ನು ನೋಡುತ್ತೇವೆ. ವಿಜ್ಞಾನ ಅದರೊಳಗಿನ ಅಂಶವನ್ನು ಹುಡುಕುತ್ತದೆ.
ಟೊಮೇಟೊ: ಕೆಂಪಿನೊಳಗಿನ ಸಸ್ಯರಸಾಯನ
ಟೊಮೇಟೊವನ್ನು ಕತ್ತರಿಸಿದಾಗ ಅದರ ಕೆಂಪು, ರಸ ತುಂಬಿದ ಒಳಭಾಗ ಕಣ್ಣಿಗೆ ಬೀಳುತ್ತದೆ. ಅದರ ಆಕಾರ ಮತ್ತು ಬಣ್ಣ ನಮ್ಮ ದೇಹದ ರಕ್ತಸಂಚಾರವನ್ನು ನೆನಪಿಸುವಂತಿದೆ. ಆದರೆ ಟೊಮೇಟೊದ ನಿಜವಾದ ಆರೋಗ್ಯ ಮೌಲ್ಯ ಅದರ ಬಣ್ಣದ ಸಂಕೇತದಲ್ಲಿ ಅಲ್ಲ; ಅದರ ಪೋಷಕಾಂಶಗಳಲ್ಲಿದೆ. ಲೈಕೋಪೀನ್‌, ವಿಟಮಿನ್‌ ಸಿ, ಪೊಟ್ಯಾಸಿಯಂ ಮತ್ತು ಇತರ ಸಸ್ಯಪೋಷಕಾಂಶಗಳು ಅದರ ಆಹಾರಮೌಲ್ಯವನ್ನು ಹೆಚ್ಚಿಸುತ್ತವೆ.
ಒಂದು ಹಣ್ಣು ನಮಗೆ “ನನ್ನ ಬಣ್ಣ ನೋಡಿ” ಎಂದು ಕರೆಯುವಂತೆ ಕಾಣಬಹುದು. ವಿಜ್ಞಾನ ಅದರೊಳಗೆ “ಏನಿದೆ?” ಎಂದು ಕೇಳುತ್ತದೆ. ನನಗೆ ಈ ಎರಡು ದೃಷ್ಟಿಗಳ ನಡುವೆ ಯಾವುದೇ ವಿರೋಧ ಕಾಣುವುದಿಲ್ಲ.
ಹಾಗಲಕಾಯಿ ಮತ್ತು ಮೇದೋಜ್ಜೀರಕ ಗ್ರಂಥಿ
ಹಾಗಲಕಾಯಿಯನ್ನು ನೋಡಿದಾಗ ಅದರ ಒಳಗಿನ ರಚನೆ, ಬೀಜಗಳು ಮತ್ತು ಉದ್ದವಾದ ಆಕಾರವನ್ನು ಕೆಲವರು ಮೇದೋಜ್ಜೀರಕ ಗ್ರಂಥಿಯೊಂದಿಗೆ ಹೋಲಿಸುತ್ತಾರೆ. ಅದಕ್ಕಾಗಿಯೇ ಹಾಗಲಕಾಯಿ ರಕ್ತದಲ್ಲಿನ ಸಕ್ಕರೆ ನಿಯಂತ್ರಣಕ್ಕೆ ವಿಶೇಷವಾಗಿ ಉಪಯುಕ್ತ ಎಂದು ಹೇಳುವ ಜನಪ್ರಿಯ ಕಲ್ಪನೆಯೂ ಇದೆ.
ಹಾಗಲಕಾಯಿಯಲ್ಲಿ ಕೆಲವು ಜೈವಿಕ ಸಕ್ರಿಯ ಸಂಯುಕ್ತಗಳಿವೆ ಮತ್ತು ರಕ್ತದಲ್ಲಿನ ಸಕ್ಕರೆಯ ಮೇಲೆ ಅದರ ಪರಿಣಾಮವನ್ನು ಕುರಿತು ಸಂಶೋಧನೆಗಳು ನಡೆದಿವೆ. ಆದರೆ ಹಾಗಲಕಾಯಿ ಮಧುಮೇಹಕ್ಕೆ ಔಷಧಿ ಅಥವಾ ಇನ್ಸುಲಿನ್‌ಗೆ ಪರ್ಯಾಯ ಎಂದು ಹೇಳಲು ಸಾಕಷ್ಟು ಸಾಕ್ಷ್ಯವಿಲ್ಲ.
ಇಲ್ಲಿಯೂ ಮತ್ತೆ ಅದೇ ಪಾಠ. ಆಕಾರ ಒಂದು ಸುಂದರ ರೂಪಕ. ಪೋಷಕಾಂಶ ಮತ್ತು ಜೈವಿಕ ಕ್ರಿಯೆಯೇ ವೈಜ್ಞಾನಿಕ ವಿವರಣೆ.
ವಾಲ್ನಟ್‌ ಮತ್ತು ಮೆದುಳು
ವಾಲ್ನಟ್‌ ಅನ್ನು ಎರಡು ಭಾಗಗಳಾಗಿ ಒಡೆದಾಗ ಅದು ನಮ್ಮ ಮೆದುಳಿನ ಎರಡು ಅರ್ಧಗೋಳಗಳನ್ನು ನೆನಪಿಸುತ್ತದೆ. ಅದರ ಮಡಚುಗಳು, ಮೇಲ್ಮೈಯ ವಿನ್ಯಾಸ…ಎಲ್ಲವೂ ವಿಚಿತ್ರವಾಗಿ ಹೋಲುತ್ತವೆ.
ವಾಲ್ನಟ್‌ನಲ್ಲಿ ಸಸ್ಯಜನ್ಯ ಒಮೆಗಾ-3 ಕೊಬ್ಬಿನಾಮ್ಲವಾದ ALA, ಕೊಬ್ಬು, ಪ್ರೋಟೀನ್, ನಾರಿನಂಶ ಮತ್ತು ವಿವಿಧ ಸೂಕ್ಷ್ಮ ಪೋಷಕಾಂಶಗಳಿವೆ. ಬೀಜಗಳು ಮತ್ತು ಕಾಯಿ ವರ್ಗವನ್ನು ಸಮತೋಲಿತ ಆಹಾರದ ಭಾಗವಾಗಿ ಸೇವಿಸುವುದು ಒಟ್ಟಾರೆ ಆರೋಗ್ಯಕ್ಕೆ ಸಹಾಯಕವಾಗುತ್ತದೆ.
ಹೀಗಾಗಿ ವಾಲ್ನಟ್‌ ಮೆದುಳಿನಂತೆ ಕಾಣುವುದೊಂದೇ ಅದರ ವಿಶೇಷತೆ ಅಲ್ಲ. ಆದರೆ ಆ ಆಕಾರ ನಮ್ಮ ಮೆದುಳಿಗೂ ಆಹಾರ ಬೇಕು ಎಂಬ ಒಂದು ಒಳ್ಳೆಯ ನೆನಪನ್ನು ಕೊಡುತ್ತದೆ.
ಸಿಹಿಗೆಣಸು ಮತ್ತು ಕಣ್ಣು
ಸಿಹಿಗೆಣಸನ್ನು ಅಡ್ಡವಾಗಿ ಕತ್ತರಿಸಿದಾಗ ಅದರ ಒಳಭಾಗ ಕಣ್ಣಿನ ರೂಪವನ್ನು ಹೋಲುತ್ತದೆ ಎಂದು ಹಲವರು ಗಮನಿಸುತ್ತಾರೆ. ಅದರಲ್ಲಿರುವ ಬೀಟಾ-ಕ್ಯಾರೋಟೀನ್‌ ದೇಹದಲ್ಲಿ ವಿಟಮಿನ್‌ ‘ಎ’ಗೆ ಪರಿವರ್ತನೆಯಾಗುತ್ತದೆ. ವಿಟಮಿನ್‌ ‘ಎ’ ಸಾಮಾನ್ಯ ದೃಷ್ಟಿ ಮತ್ತು ಕಣ್ಣಿನ ಆರೋಗ್ಯಕ್ಕೆ ಅಗತ್ಯವಾದ ಪೋಷಕಾಂಶ.
ಇಲ್ಲಿ ಮಾತ್ರ ಆಕಾರದ ರೂಪಕದ ಜೊತೆಗೆ ಪೋಷಕಾಂಶದ ಸಂಬಂಧವೂ ನಮಗೆ ಕಾಣುತ್ತದೆ. ಆದರೆ ನಾವು ನೆನಪಿಟ್ಟುಕೊಳ್ಳಬೇಕಾದ ಇನ್ನೊಂದು ಸತ್ಯ – “ಕಣ್ಣಿನ ಆಕಾರದಲ್ಲಿದೆ” ಎಂಬ ಕಾರಣಕ್ಕೆ ಕಣ್ಣಿನ ಕಾಯಿಲೆಗಳನ್ನು ಗುಣಪಡಿಸುವುದಿಲ್ಲ. ಪ್ರಕೃತಿಯ ಚಿತ್ರವನ್ನು ನೋಡಿ ವಿಜ್ಞಾನವನ್ನು ನೆನಪಿಸಿಕೊಳ್ಳಬಹುದು. ಆದರೆ ಚಿತ್ರವನ್ನೇ ವಿಜ್ಞಾನವೆಂದು ಪರಿಗಣಿಸಬಾರದು.
ಸೋರೆಕಾಯಿ ಮತ್ತು ದೇಹದ ಒಳಗಿನ ಲೋಕ
ಸೋರೆಕಾಯಿ, ಸೌತೆಕಾಯಿ, ಕುಂಬಳಕಾಯಿ, ಪಡುವಲಕಾಯಿಯಂತಹ ತರಕಾರಿಗಳು ಉದ್ದ, ಮೃದುವಾದ ಅಥವಾ ಗೋಳಾಕಾರದ ವಿನ್ಯಾಸಗಳು ನಮ್ಮ ದೇಹದ ವಿವಿಧ ಅಂಗಾಂಗಗಳ ರೂಪಗಳನ್ನು ನೆನಪಿಸಬಹುದು.
ಸೋರೆಕಾಯಿಯಲ್ಲಿ ನೀರಿನ ಅಂಶ ಹೆಚ್ಚಿದ್ದು, ಕಡಿಮೆ ಶಕ್ತಿಮೌಲ್ಯದ ತರಕಾರಿಯಾಗಿ ಆಹಾರದಲ್ಲಿ ಬಳಸಬಹುದು. ಅದರಲ್ಲಿರುವ ಕೆಲವು ಪೋಷಕಾಂಶಗಳು ಮತ್ತು ಸಸ್ಯಸಂಯುಕ್ತಗಳು ಆಹಾರದ ಭಾಗವಾಗಿ ಉಪಯುಕ್ತ. ಆದರೆ ಅದನ್ನು ನಿರ್ದಿಷ್ಟವಾಗಿ ಗರ್ಭಕೋಶವನ್ನು “ಶುದ್ಧೀಕರಿಸುವ” ಅಥವಾ ಯಾವುದಾದರೂ ಒಂದು ಅಂಗವನ್ನು ವಿಶೇಷವಾಗಿ ಸರಿಪಡಿಸುವ ಆಹಾರ ಎಂದು ಹೇಳಲು ವೈಜ್ಞಾನಿಕ ಆಧಾರವಿಲ್ಲ. ಆದರೂ ಸೋರೆಕಾಯಿಯನ್ನು ಕೈಯಲ್ಲಿ ಹಿಡಿದುಕೊಂಡಾಗ ಪ್ರಕೃತಿಯ ವಿನ್ಯಾಸದ ಬಗ್ಗೆ ಯೋಚಿಸುವುದನ್ನು ತಡೆಯಲು ಸಾಧ್ಯವಿಲ್ಲ!
ಗಡ್ಡೆಗಳು: ಮಣ್ಣಿನೊಳಗೆ ಬೆಳೆದ ದೇಹದ ಆಹಾರ
ಆಲೂಗಡ್ಡೆ, ಸಿಹಿಗೆಣಸು, ಮರಗೆಣಸು, ಬೀಟ್‌ರೂಟ್‌, ಕ್ಯಾರೆಟ್‌, ಮೂಲಂಗಿ ಇತ್ಯಾದಿ ಮಣ್ಣಿನೊಳಗೆ ಬೆಳೆಯುವ ಗಡ್ಡೆ ಮತ್ತು ಬೇರು ತರಕಾರಿಗಳು ಪ್ರಕೃತಿಯ ಮತ್ತೊಂದು ಅದ್ಭುತ ಲೋಕ.
ಕ್ಯಾರೆಟ್‌ನ ಉದ್ದವಾದ ಆಕಾರವನ್ನು ಕಣ್ಣಿನೊಂದಿಗೆ ಜೋಡಿಸುವ ಜನಪ್ರಿಯ ಕಲ್ಪನೆ ಇದೆ. ಬೀಟ್‌ರೂಟ್‌ನ ಕೆಂಪು ಬಣ್ಣ ರಕ್ತವನ್ನು ನೆನಪಿಸುತ್ತದೆ. ಆದರೆ ಅವುಗಳ ಆರೋಗ್ಯ ಪ್ರಯೋಜನಗಳನ್ನು ಅರ್ಥಮಾಡಿಕೊಳ್ಳಬೇಕಾದರೆ ಅವುಗಳಲ್ಲಿರುವ ಕ್ಯಾರೋಟಿನಾಯ್ಡ್‌ಗಳು, ನೈಟ್ರೇಟ್‌ಗಳು, ನಾರಿನಂಶ, ಫೋಲೇಟ್‌ ಮತ್ತು ಇತರ ಪೋಷಕಾಂಶಗಳ ಕಡೆಗೆ ನೋಡಬೇಕು. ಪ್ರಕೃತಿ ನಮಗೆ ಒಂದು ಚಿತ್ರ ಕೊಡುತ್ತದೆ. ವಿಜ್ಞಾನ ಅದರೊಳಗಿನ ರಸಾಯನವನ್ನು ತೋರಿಸುತ್ತದೆ.
ಬೀಜಗಳು: ಒಂದು ಸಣ್ಣ ಕಾಳಿನಲ್ಲಿ ಒಂದು ದೊಡ್ಡ ಭವಿಷ್ಯ
ಇವೆಲ್ಲದರ ನಡುವೆ ಬೀಜಗಳು ನನಗೆ ಇನ್ನೂ ವಿಚಿತ್ರವಾಗಿ ಕಾಣುತ್ತವೆ. ಒಂದು ಪುಟ್ಟ ಬೀಜದೊಳಗೆ ಒಂದು ಸಂಪೂರ್ಣ ಗಿಡದ ಸಾಧ್ಯತೆ ಇರುತ್ತದೆ. ಅದು ಮಣ್ಣು, ನೀರು, ಬೆಳಕು ಮತ್ತು ಸಮಯ ಸಿಕ್ಕಾಗ ತನ್ನೊಳಗಿದ್ದ ವಿನ್ಯಾಸವನ್ನು ಹೊರಗೆ ತರುತ್ತದೆ.
ಬಾದಾಮಿ, ಅಗಸೆಬೀಜ, ಎಳ್ಳು, ಕುಂಬಳಕಾಯಿ ಬೀಜ, ಸೂರ್ಯಕಾಂತಿ ಬೀಜ, ಚಿಯಾ, ವಾಲ್ನಟ್‌…. ಹೀಗೆ ಪ್ರತಿಯೊಂದಕ್ಕೂ ತನ್ನದೇ ಆದ ಕೊಬ್ಬು, ಪ್ರೋಟೀನ್, ನಾರಿನಂಶ, ಖನಿಜಗಳು ಮತ್ತು ಸಸ್ಯಪೋಷಕಾಂಶಗಳಿವೆ. ಇಲ್ಲಿ “ಆರೋಗ್ಯಕ್ಕಾಗಿ ನಮ್ಮನ್ನು ತಿನ್ನಿ” ಎಂದು ಪ್ರಕೃತಿ ಕೂಗುತ್ತಿರುವಂತೆ ಅನಿಸುತ್ತದೆ. ವಾಸ್ತವವಾಗಿ ಪ್ರಕೃತಿ ಮಾತನಾಡುತ್ತದೆಯೋ ಇಲ್ಲವೋ ಗೊತ್ತಿಲ್ಲ. ಆದರೆ ನಾವು ಕೇಳಲು ಕಲಿತರೆ, ಆಹಾರವೇ ನಮ್ಮ ದೇಹದೊಂದಿಗೆ ನಡೆಯುವ ಒಂದು ಸಂಭಾಷಣೆಯಾಗುತ್ತದೆ.
ಪ್ರಕೃತಿಯ ರೂಪಕ ಮತ್ತು ವಿಜ್ಞಾನದ ಸತ್ಯ
ಬಹುಶಃ ನಮ್ಮ ಪೂರ್ವಜರು ಸುತ್ತಲಿನ ಪ್ರಕೃತಿಯನ್ನು ಬಹಳ ಸೂಕ್ಷ್ಮವಾಗಿ ಗಮನಿಸುತ್ತಿದ್ದರು. ಸಸ್ಯದ ಬಣ್ಣ, ರುಚಿ, ವಾಸನೆ, ಋತು, ಬೆಳೆಯುವ ಸ್ಥಳ, ಅದರ ಬಳಕೆ ಇವೆಲ್ಲವನ್ನು ಗಮನಿಸಿ ಆಹಾರ ಸಂಸ್ಕೃತಿಯನ್ನು ರೂಪಿಸಿಕೊಂಡರು.
ಇಂದು ನಾವು ಒಂದು ಹೆಜ್ಜೆ ಮುಂದೆ ಹೋಗಬೇಕು. ಪ್ರಕೃತಿಯ ರೂಪಕಗಳನ್ನು ಆಸಕ್ತಿಯಿಂದ ನೋಡಬಹುದು. ಆದರೆ ಅವುಗಳನ್ನು ವೈಜ್ಞಾನಿಕ ಸತ್ಯವೆಂದು ಘೋಷಿಸುವ ಮೊದಲು ಸಾಕ್ಷ್ಯ ಕೇಳಬೇಕು. ಕಿಡ್ನಿಯಂತೆ ಕಾಣುವ ಬೀನ್ಸ್ ಕಿಡ್ನಿಯನ್ನು ನೇರವಾಗಿ “ಗುಣಪಡಿಸುವುದಿಲ್ಲ”. ಹೃದಯದಂತೆ ಕಾಣುವ ಆಹಾರ ಹೃದಯದ ಔಷಧಿಯಲ್ಲ. ಮೆದುಳಿನಂತೆ ಕಾಣುವ ವಾಲ್ನಟ್‌ ಮೆದುಳಿನ ಕಾಯಿಲೆಗೆ ಚಿಕಿತ್ಸೆ ಅಲ್ಲ. ಹಾಗಲಕಾಯಿ ಮೇದೋಜ್ಜೀರಕ ಗ್ರಂಥಿಯಂತೆ ಕಾಣುವುದರಿಂದ ಅದು ಇನ್ಸುಲಿನ್‌ಗೆ ಪರ್ಯಾಯವಾಗುವುದಿಲ್ಲ.
ಇದರರ್ಥ ಈ ಹೋಲಿಕೆಗಳೆಲ್ಲ ಅರ್ಥಹೀನವೆಂದಲ್ಲ. ಅವು ನಮಗೆ ಗಮನಿಸಲು ಕಲಿಸುತ್ತವೆ. ಆಹಾರವನ್ನು ಕೇವಲ ರುಚಿಯಾಗಿ ನೋಡದೆ, ಅದರೊಳಗೆ ಏನಿದೆ ಎಂದು ಕೇಳಲು ಪ್ರೇರೇಪಿಸುತ್ತವೆ. ದೇಹವನ್ನು ಕೇವಲ ಅಂಗಾಂಗಗಳ ಗುಂಪಾಗಿ ನೋಡದೆ, ಆಹಾರ, ಪರಿಸರ ಮತ್ತು ಜೀವನಶೈಲಿಯೊಂದಿಗೆ ಸಂಬಂಧಿಸಿದ ಒಂದು ಜೀವಂತ ವ್ಯವಸ್ಥೆಯಾಗಿ ನೋಡಲು ಪ್ರೇರೇಪಿಸುತ್ತವೆ.
ಮತ್ತೆ ನನ್ನ ಬೀನ್ಸ್ ಕಡೆಗೆ
ಇಷ್ಟೊಂದು ಸಸ್ಯರಾಶಿಯ ನಡುವೆ ನಿಂತಾಗ ನನಗೆ ಮತ್ತೆ ನನ್ನ ಬೀನ್ಸ್ ನೆನಪಾಗುತ್ತದೆ. ಒಂದು ಬೀನ್ಸ್ ಗಿಡದಲ್ಲಿ ಎಷ್ಟು ವಿಧ! ಒಂದರ ಕಾಯಿ ಉದ್ದ. ಇನ್ನೊಂದರದು ದಪ್ಪ. ಮತ್ತೊಂದರದು ಸಣ್ಣ. ಒಂದರ ಬೀಜ ಬಿಳಿ. ಮತ್ತೊಂದರದು ಕಪ್ಪು. ಇನ್ನೊಂದರದು ಕಂದು. ಕೆಲವು ಗಿಡಗಳು ನೆಲದ ಮೇಲೆ. ಕೆಲವು ಚಪ್ಪರ ಹತ್ತಿ ಬಳ್ಳಿಯಾಗಿ ದೂರ ಸಾಗುತ್ತವೆ. ಒಂದೇ ಕುಟುಂಬದೊಳಗೆ ಇಷ್ಟೊಂದು ವೈವಿಧ್ಯ!
ನಮ್ಮ ಮನುಷ್ಯರಲ್ಲೂ ಹಾಗೆಯೇ ಅಲ್ಲವೇ? ದೇಹ ಮತ್ತು ವಿನ್ಯಾಸ ಒಂದೇ ಆದರೂ ಪ್ರತಿಯೊಬ್ಬರ ಬೆಳವಣಿಗೆಯ ರೀತಿಯೂ ಬೇರೆ. ಆಹಾರ, ಅನುಭವ, ಮನಸ್ಸು , ಜೀವನದ ದಾರಿ ಎಲ್ಲವೂ ಬೇರೆ ಬೇರೆ.
ನಾನು ಚೌಳಿ ಕಾಯಿ ಗಿಡ.
ಬೀನ್ಸ್ ತಳಿಯಲ್ಲಿ ರುಚಿಗೆ ಅಲಸಂದೆ ರಾಜನಾದರೆ, ಬದುಕಿನ ಪಾಠಕ್ಕೆ ಚೌಳಿ ಕಾಯಿಯ ಗಿಡ ನನಗೆ ಇಷ್ಟ. ಯಾಕೆಂದರೆ ಅದು ಒಣ ನೆಲದಲ್ಲೂ ಬೆಳೆಯುತ್ತದೆ. ಹೆಚ್ಚು ನೀರು ಬೇಡ. ಹೆಚ್ಚು ಮುದ್ದು, ಆರೈಕೆ ಬೇಡ. ಬಿಸಿಲು ಜೋರಾಗಿದ್ದರೂ ತನ್ನ ಪಾಡಿಗೆ ಚಿಗುರೊಡೆದು ಕಾಯಿ ಬಿಡುತ್ತದೆ. ಯಾರೂ ಹೆಚ್ಚು ಗಮನ ಕೊಡದಿದ್ದರೂ ತನ್ನೊಳಗಿನ ಶಕ್ತಿಯನ್ನು ಮಣ್ಣಿನಿಂದ ಎಳೆದುಕೊಂಡು ಬೆಳೆಯುತ್ತದೆ. ಹೀಗೆ ಒಣಗಿ ಸತ್ತುಹೋಯಿತು ಎಂದುಕೊಳ್ಳುವಷ್ಟರಲ್ಲಿ ಮತ್ತೆ ಚಿಗುರೊಡೆದು ಗೊಂಚಲು ಗೊಂಚಲು ಕಾಯಿ ಬಿಡುತ್ತದೆ!
ಬಹುಶಃ ಅದಕ್ಕೇ ನನಗೆ ಅದು ನನ್ನದೇ ರೂಪಕದಂತೆ ಭಾಸವಾಗುತ್ತದೆ. ಸುಮಾರು ಮೂವತ್ತೈದು ವರ್ಷಗಳ ಅಡುಗೆ ಕೆಲಸ ಇನ್ನು ಸಾಕು ಎನ್ನುವ ಹೊತ್ತಿನಲ್ಲೂ, ಪ್ರಕೃತಿಯ ಈ ಸೊಬಗು ಮತ್ತೆ ನನ್ನನ್ನು ಅಡುಗೆಗೆ ಪ್ರೇರೇಪಿಸುತ್ತದೆ.
